O Camiño Sustentable nace a proposta da Reserva da  Biosfera Mariñas Coruñesas e Terras  do  Mandeo para buscar unha forma entretida e amena de dar a coñecer o funcionamento dunha Reserva da  Biosfera e os seus obxectivos.

Non foi fácil ao principio, pensamos en moitas cousas, pero ao final unha idea foi cobrando forza, unha idea que se convertería nunha aventura. Porque somos dous amigos amantes da natureza e da bicicleta, un fotógrafo e un enxeñeiro, con ganas de explicar o que é a sustentabilidade (esa palabra case tan usada como descoñecida).

Para aprender algo o mellor é preguntar aos que saben, así que nos pareceu que preguntar nas propias Reservas da  Biosfera era o mellor e deberiamos buscar neses territorios proxectos como exemplo de sustentabilidade.

Así que miramos o mapa de España con todas as Reservas da  Biosfera: Onde poderiamos ir? Como iamos ir? Como podía ser unha viaxe sustentable?, as preguntas tiveron unha resposta case inmediata. Quizais axudou que xa fixeramos o Camiño de Santiago no ano 2014 pero parecía obvio, debiamos ir en bicicleta. Algo estabamos a facer ben, o noso primeiro exemplo seriamos nós mesmos, usando un medio de transporte sustentable. En canto á ruta acabou sendo unha interpretación libre do Camiño de Santiago houbo saltos entre o Camiño Primitivo, o do Norte e o Francés.

Foron catro Reservas da  Biosfera as que visitamos, pouco tempo en cada unha pero moi intenso, atopamos ás persoas adecuadas para que respondesen a todas as nosas preguntas e contásennos todo o necesario para crear conciencia sobre a sustentabilidade.

Todo estaba listo! Podiamos coller un tren para ir a Hendaia e comezar unha viaxe de 14 días que nos levaría a Santiago de Compostela e ademais de facernos pasar momentos inesquecibles (tanto os bos como os malos) conseguiriamos gravar o material suficiente para o documental “O camiño cara ao sustentable”

Pero este camiño non se detén na nosa viaxe, no noso ao redor hai moitas historias que contar, moitas persoas que como ti loitan por facer un mundo máis sustentable, nesta páxina coñeceremos o seu traballo, o seu camiño cara ao sustentable.

Contacta connosco se queres contar como fas o teu Camiño Sustentable!

Daniel Vázquez Ambroa

Rodrigo López Piquín